Chor viril Surses a caschung digl concert da gala da la festa da cant districutala Surselva a Glion (28 da matg 2011) - Foto: Rolf Canal

Igl zarcladour 2007 ò igl chor viril Surses pudia festivar igl sies 100avel anniversari. Igl chor da tradiziun dombra actualmaintg 65 commembers e vign dirigia da Luzius Hassler. Hassler è scolast da musica alla scol’ota da pedagogia da Coira. Igl chor da vallada fascinescha cun en repertori fitg lartg. Cun canzungs scu „Return“ u „Mobilisaziun“ digl poet indigen Pader Alexander Lozza tigna igl chor ot la tradiziun locala. Mademamaintg è igl chor er avert per novas ovras contemporanas scu „Mosaic Sursetter“ digl cumponist grischunes Gion Giusep Derungs. Igl chor viril Surses n’ò actualmaintg betg da cumbatter cun en domber da commembers sminuond scu blers oters chors. Gist igl cuntrari è igl cass; durant igls davos tschintg onns è igl domber da commembers s’augmento da 55 sen 65. Gl’è er fitg plaschevel tgi la generaziun giovna sa lascha fascinar pigl cant. Speragn, tgi chest trend tigna anc anavant dei…